Күптән түгел Зәйнәб Биишева исемендәге «Китап» нәшриәтендә билдәле яҙыусы-сатирик, журналист Венер Исхаҡовтың ҡағыҙ һәм электрон вариантта «Өй эйәһе» исемле китабы донъя күрҙе.

    Әҙиптең был китабына һуңғы йылдарҙа ижад ителгән әҫәрҙәре тупланған. Йәмғиәтебеҙҙәге етешһеҙлектәрҙе шул тиклем ябай, һәр кешегә аңлайышлы итеп яҙыуы менән алдыра автор. Уның  юмористик хикәйәләре ҡоро күңел асыуға, ауыҙ йырыуға түгел, ә ғибрәтле хәл-ваҡиғалар аша тормоштағы мәҙәни, әхлаҡи етешһеҙлектәрҙе фашлауға ҡоролған.

"Венер Исхаҡовтың әҫәрҙәрен уҡыған һайын көлгө, көлгән һайын уҡығы килә", - тип яҙғайны ҡәләмдәше Салауат Әбүзәр. Бик хаҡ һүҙҙәр. Ысынлап та, уның әҫәрҙәре ҡоро күңел асыуға, ауыҙ йырыуға түгел, ә ғибрәтле хәл-ваҡиғалар аша тормоштағы мәҙәни, әхлаҡи етешһеҙлектәрҙе фашлауға ҡоролған. Кешенең холоҡ-фиғелен яҡшы белгән, халыҡ һөйләшен хикәйәләрендә уңышлы ҡулланған, һутлы тел менән яҙған Венер Исхаҡов бөгөн башҡорт сатириктары араһында алдынғы сафта бара. Бәлки, ошо һүҙҙәрем кемдәргәлер арттырыу тип тойолор, әммә был ысынлап та шулай. http://tabin.ru/mezeniet_ezebiet/658-kitapty-da-bula-tatlyy.html

Венер Айҙар улы Исхаҡов 1967 йылдың 20 мартында Ғафури районының Ҡаран-Йылға ауылында тыуған. Мәктәпте тамамалағандан һуң Башҡорт дәүләт университетында белем ала һәм хеҙмәт юлын республика балалар "Йәншишмә" гәзите редакцияһында хәбәрсе булараҡ башлай, Ғафури районының "Табын" район гәзитендә лә эшләргә тура килә.

 2006-2011 йй. – “Һәнәк” сатира журналында эш хеҙмәтен дауам итә. Әлеге ваҡытта респуликаның ижтимағи-сәйәси “Башҡортостан” гәзите редакцияһында хаттар бүлеген етәкләй. Бөгөнгө көндә Венер Исхаҡов – сатира һәм юмор өлкәһендә иң уңышлы һәм емешле эшләгән әҙиптәрҙең береһе. Уның "Таяҡ” исемле тәүге йыйынтығы юмор һәм сатира яратыусы уҡыусыларға таныш,"Шоколад ниңә асыуланды?” тип аталған икенсе китабы иһә кескәй уҡыусыларға тәғәйенләнгән.