Яныбай Хамматов исемендәге Сермән модель китапханаһында “Хәтирә” фольклор ансамбле ағзаһы, матур шиғыры, йырҙары менән күңелдәрҙе арбаған Альбина Алтынбай ҡыҙы Хәйретдинованың ижад кисәһе уҙҙы. Уны китапхана хеҙмәткәрҙәре Зилә Фәхрисламова менән Гөлнур Мусина әҙерләп алыпбарҙы.

Матур сараға “Иҙел башы” яҙыусылар ойошмаһы етәксеһе, Башҡортостан Яҙыусылар союзы ағзаһы Мансур Һиҙиәтов, “Урал” гәзите мөхәррире Сатура Минһажитдинова, шағир һәм һәүәҫкәр композитор Сәйфулла Ғайсин, Сермән ауыл хакимиәте башлығы Лилиә Сибәғәтова, ветеран-уҡытыусылар Тәскирә Харисова, Клара Миһранова, Әнүзә Ғәлимова, Йәзилә Исламова, Рәзилә Сәфәрғәлиева, балаларға башҡорт теленән белем биргән йәш уҡытыусы Ғәлиә Ялмырҙина, туғандары Кималовтар һәм Абдрахмановтар, күршеләре килгәйне.

Уларҙың һәр береһе Альбина Алтынбай ҡыҙының талантлы ғына түгел, изге, матур күңелле, уңған хужабикә булыуын билдәләне. Әҙәбиәткә, сәнғәткә ғашиҡ ханымдың йорто ла, ихатаһы ла иртә яҙҙан алып ҡар ятҡансы гөл-сәскәләргә күмелеп ултыра. Нәзәкәтле, зауыҡлы, һәр яҡлап та камиллыҡҡа ынтылған ҡатынға һоҡланмаған кеше юҡ. Ул донъяның, тормоштоң бөтә матурлығын ҡағыҙ битенә төшөрөп ҡалырға тырыша. Һәр сығыш яһаусы уны ҡотлап, изге теләктәрен еткерҙе һәм бүләк тапшырҙы.

Кисәне Сафура Абдрахманованың йыры, Гүзәл Ағзамованың бейеүе, Альбина Алтынбай ҡыҙының ейәне Вадим Хәйретдиновтың ҡурай моңо биҙәне. Альбина Хәйретдинова мәктәп йылдарынан нәфис һүҙгә ғашиҡ булһа ла, хаҡлы ялға сыҡҡас ҡына шиғырҙар яҙа башлай.

Йырларға яратҡан ханым “Хәтирә” фольклор ансамблендә сығыш яһай. “Иҙел башы” ойошмаһы ағзаһы булған ҡәләмдәшебеҙгә уңыштар теләйек. 

Сығанаҡ: http://ural-rb.ru/2073-kelend-gl-ssk.html