"Төньяҡ балҡышы" фестивале Яңауылда 2012 йылдан алып уҙғарыла. Бәйге-балалар һәм үҫмерҙәрҙең һәләттәрен асыу һәм үҫтереү буйынса Яңауыл ҡалаһының муниципаль проекты. Күптән түгел район Мәҙәниәт һарайында "Төньяҡ балҡышы" балалар ижады конкурсының һәләтле балалар сығыштарынан торған Гала-концерты уҙҙы.

Фестиваль майҙаны йылдан-йыл киңәйә бара - 3 йәштән алып 18 йәшкә тиклемге булған һәләтле балалар үҙҙәрен вокал, йыр, бейеү, акробатика, тасуири уҡыу, оригиналь жанрҙарҙа һынаны. Конкурстың һайлап алыу этабын уңышлы үтеүселәр үҙҙәренең таланттарын телевизион эфирҙа күрһәтә алды, тип хәбәр иттеләр район хакимиәтенең мәғлүмәт-аналитика бүлегенән.

Конкурстың маҡсаты изге - балаларҙа үҙешмәкәр сәнғәтте үҫтереү һәм яңынан-яңы һәләттәр асыу. Быйылғы конкурс оҫта итеп йырлаған, бейегән, тасуири шиғыр уҡыған, төрлө музыка ҡоралдарында уйнаған балаларҙы берләштерҙе.