Силәбелә 2015 йылдың мартында башланған “Осҡон” башҡорт видеоконкурсына йомғаҡ яһалды. 50 роликтың 12-һе дүрт номинацияла өсәр призлы урын алды: мобиль видео, социаль видеоролик, музыкаль клип һәм ҡыҫҡа метражлы фильм. Еңеүселәргә бүләктәр тапшырылды.

Жюри составына Силәбе һәм Өфө белгестәре – клипмейкер Тимур Сафиул­лин, режиссер һәм уҡытыусы Александр Мор­дасов, режиссер Таң­сул­пан Бураҡа­ева, яҙыусы, “Башҡорт­остан” гәзитенең баш мөхәррире Азамат Юлдашбаев һәм Баш­ҡортостан юлдаш телевиде­ниеһы алып барыу­сыһы Ләйсән Мәжитова – ин­гән. Фестиваль ҡунаҡ­тары араһында Өфө, Мәскәү, Санкт-Петербург ҡалала­ры­нан ҡатнашыу­сылар бар ине, улар мах­сус саҡырылған эксперт, Свердловск ки­ностудияһы ҡарамағындағы Кино мәктәбе уҡытыусыһы Алексей Ста­сюктың оҫталыҡ дәресен ҡараны. Шулай уҡ Таңсулпан Бураҡаева һәм музыкаль клип­тар төшөрөү менән шөғөлләнгән баш­ҡорт ойошмалары “Е7Е-media” ме­нән “Уралстарс” файҙалы кәңәштәрен бирҙе.
Силәбе өлкәһенең башҡорт йәш­тәре ойошмаһы, бындай фестивалде тәүгә үт­кәрһә лә, тамашасыларҙы йәлеп итә алды. Ватандаштарҙың кинематография өлкәһендәге оҫта­лығын үҫтереү, мәҙәни потенциалын асыу, мөһим социаль проб­лемаларға йәмғиәттең иғтиба­рын арттырыу, башҡорт мәҙә­ниәтен пропагандалау маҡса­тындағы сара көйлө генә үтте.
– Конкурс яҙҙан алып 30 ноябргә тиклем барҙы. Беренсе тапҡыр үткәргәс, ниндәй һөҙөмтәләр булыуын күҙаллай алманыҡ. Шулай ҙа кон­курс­ҡа илленән ашыу эш килде. Был – беҙҙең өсөн ҙур һөҙөмтә. Ҡатнашырға теләп тә, эштәрен ебәреп өлгөрмәгән­дәрҙең теләген иғтибарға алып, конкурс артабан йыл һайын ойошторо­ласаҡ. Музыкаль видеоклип­ҡа өҫтөн­лөк биреү­селәр күп булды. Быйыл конкур­санттар тема төрлөлөгөнә иғтибарҙы арттырыр тип өмөтләнәбеҙ, – тине ойоштороу­сыларҙың береһе Изалия Ғүмәрова.

Еңеүселәр араһынан иң йәше Учалы ҡалаһынан Заһир Солтанов булды. Уға 13 йәш, VIII класта уҡый. “Шакирйән Матросов батырлығы” тип аталған матур анимация төшөрөп ебәргән Заһир. Жюри был видеоны ҙур баһаға лайыҡ тип тапты һәм “социаль видеояҙма” номина­цияһында беренсе урын бирҙе. 

Конкурстың Силәбелә үткәрелеүен жюри рәйесе Әлфир Илбәктин былай тип аңлатты:
– Сараны башлар алдынан партнер­ҙарыбыҙ, Мәскәү һәм Санкт-Петер­бургтағы Башҡортостан студенттары ассоциацияһы ағзалары менән бик күп уйланыҡ, Өфөлә үткәрергә тигән тәҡдим дә бар ине. Тик оҙаҡ кәңәш­ләшкәндән һуң үҙебеҙҙә туҡталдыҡ, сөнки күп көс, сығымдар талап ителә. Бер көс булып тупландыҡ бында. Маҡсаттар тормошҡа ашты.
“Осҡон-2016” бәйгеһенә ғаризалар ҡабул итеү 15 февралдән һуң башлана.

"Башҡортостан" гәзитенән