29 сентябрь көнө, “Башҡортостан” дәүләт концерт залында  «Юлдаш йыры» асыҡ республика конкурсының Гала-концерты үтәсәк.

"Юлдаш йыры"-ижад менән әүҙем шөғөлләнгән, халыҡ һәм эстрада йырҙарын оҫта башҡарыусыларҙы билдәләй һәм уларҙың артабанғы үҫешенә булышлыҡ итә.

Бәйгелә Башҡортостан Республикаһынан, шулай уҡ Рәсәй Федерацияһының башҡа региондарынан, сит илдәрҙән башҡорт һәм татар телдәрендә йырлаған, 16 йәштән 60 йәшкә тиклемге үҙешмәкәр башҡарыусылар, шулай уҡ ҡатнашыусылар башҡарыуында үҙ яҙмаларын тәҡдим иткән йыр авторҙары ҡатнаша.

Еңеүселәрҙе билдәләгәндә  өсөнсө, икенсе, беренсе урындар һәм Гран-при биреү ҡаралған.

Конкурс барышында профессиональ жюри шулай уҡ иң яҡшы композитор эшен, иң яҡшы шиғри әҫәрҙе билдәләй.   

Өсөнсө (финал) турҙа ҡатнашыусылар «Юлдаш йыры» асыҡ республика конкурсының Дипломанты исемен ала. Еңеүселәр араһында өсөнсө, икенсе, беренсе урындар, Гран-при эйәһе билдәләнә, уларға «Юлдаш йыры» асыҡ республика конкурсының Лауреаты исеме бирелә, ойоштороусынан бүләктәр тапшырыла. Гала-концерт Башҡортостан юлдаш телевидениеһынан, «Ҡурай» каналынан күрһәтелә. Конкурста ҡатнашыусылар үҙҙәренең башҡарыу оҫталығын «Юлдаш» мәғлүмәт һәм йыр-моң каналында, "Башҡортостан юлдаш телеканалы"нда,  «Ашҡаҙар» радиоһында пропагандалау мөмкинлеген ала.

 Радионың рәсми сайтында “Юлдаш йыры-2017” республика асыҡ конкурсы финалына үткән башҡарыусыларҙың йырҙары өсөн тауыш биреү бара: http://yuldashfm.ru/ba/parad
Үҙегеҙгә оҡшаған йыр өсөн тәүлегенә бер тапҡыр тауыш бирергә мөмкин. “Тамашасы һөйөүе” номинацияһында еңеүсе исеме 29 сентябрҙә Гала-концертта иғлан ителәсәк.