Кисә, йәғни 29 ноябрь көнө «Башҡортостан» дәүләт концерт залында «Юлдаш хит 2016” йыр бәйгеһенең Гала-концерты уҙҙы. Гала-концертта һайлап алыу турҙарын уҙған, 30 йәш йырсы үҙҙәренең оҫталыҡтарын күрһәтте.

Тамашала радио тыңлаусылар тарафынан һайлап алынған ғына йырҙар яңғыраны. Бөтә донъя фольклориадаға бағышланып үткәрелгән гала-концерт Башҡортостандың халыҡ артисы Радик Вәлмөхәмәтов башҡарыуындағы “Башҡорт ҡурайы” йыры менән асылды. Күптәребеҙҙең яратҡан артистары Лилиә Букеева, Раүилә Мөсәлимова, Юнир Һағынбаев йырҙарын тамашасылар ихлас алҡыштарға күмде. Светлана Хәҡимова, Лилиә Ишимйәрова, Искәндәр Ғәзизов, Әлим Ҡәйүмов сығыштары гала-концертҡа йәм өҫтәне. Конкурстың барлыҡ финалистары ла «ЮлдашХит» статуэткаһы менән бүләкләнде.

Йәнле тамашаны радио тыңлаусыларҙың иң яратҡан алып барыусылары Филүс Ҡасимов, Йәмил Ишмөхәмәтов һәм Фәрүәз Урманшин алып барҙы. Концертҡа килгән тамашасылар ҙа бүләкһеҙ ҡалманы, бәхетле билет һатып алыусылар махсус бүләктәр отто . Башҡорт эстрадаһы йондоҙҙарын йыйған зур сәхнәлә иң яҡшы заманса йырҙар яңғыраны.

Гүзәл Багаева