Билдәле рок-йырсыһы яҡташыбыҙ Юрий Шевчук республика рәссамдарын "Минең яратҡан Башҡортостан рәссамы" исемле китабының нәшер ителеүе менән ҡотланы. ДДТ төркөмө лидеры яңы китапты йыйынтыҡ авторы Наил Мәхмүтовтан почта аша алған.
Өфөлә күптән түгел исем туйы үткән баҫма былтыр йәй "Минең яратҡан Башҡортостан рәссамы" исеме аҫтында старт алған социаль интернет-проектҡа нигеҙләнеп нәшер ителгән.
Башҡорт рәссамдары ижадын популярлаштырыуға йүнәлтелгән проектҡа 2018 йыл башында йомғаҡ яһалғайны. Тауыш биреү һөҙөмтәләре буйынса унда 21 ҡыл ҡәләм оҫтаһының ижады төрлө номинацияларҙа билдәләнде.