Яңыраҡ ҡына “Китап” нәшриәтендә бөйөк композитор Заһир Исмәғилевтың әҫәрҙәре йыйынтығының һигеҙенсе томы баҫылып сыҡты.

Китапҡа “Сыңрау торна” балетеның клавиры ингән. Заhир Ғәрип улы Исмәғилевтың тыуыуына 100-йыллығына арналған ноталы баҫма 300 экземпляр тираж менән нәшер ителгән.

Китап баҫтырыу өсөн материалдарҙы атаҡлы композиторҙың ҡыҙы Ләйлә Исмәғилева тәҡдим иткән. Тәү башлап 16 том нәшер ителеү планлаштырыла. Тәүге том 1000 экземпляр менән 2005 йылда донъя күргән. Алты томға композиторҙың “Салауат Юлаев”, “Аҡмулла”, “Урал илсеһе”,”Шәүрә”, “Ҡаһым түрә”, “Ағиҙел тулҡындары”, “Ҡоҙаса” опера клавиралары ингән.

Либреттоларҙың барыһы ла башҡорт телендә баҫылған, фотографиялар, факсимилдәр, автографтар менән биҙәлгән.

Баҫманы “Китап” нәшриәтенең кибеттәрендә һатып алырға мөмкин, шулай уҡ китап менән республика китапханаларында таныша алаһығыҙ.