Зәйнәб Биишева исемендәге Башҡортостан “Китап” нәшриәте 2017 йылдың 9 сентябрендә Благовещен ҡалаһында “Книгоград: архитектура интеллекта” исемле китап фестивалендә ҡатнаша. Фестиваль китап уҡыу мәҙәниәтен үҫтереүгә арнала. Ул Рәсәйҙә тәүге тапҡыр ойошторолоп, 2017 йылдың 26 авгусынан 23 сентябренә тиклем төрлө ҡалаларҙа үтә.
    Оло һәм кесе йәштәгеләрҙе китап уҡырға, китап һөйөргә, китап менән дуҫ булырға өндәү, китаптың йәмғиәттәге тотҡан урынын билдәләү сараның төп маҡсаттарының береһе булып тора. Ул шулай уҡ Рәсәй һәм сит ил авторҙарының китаптарын пропагандалауға ла, төрлө жанрҙарҙа яҙылған әҙәби әҫәрҙәргә ҙур ҡыҙыҡһыныу уята белеүгә лә йүнәлтелгән.
    Фестиваль әҙәбиәт һөйөүселәргә “Художественный квартал”, “Промышленный квартал”, “Забавный квартал”, “Подиум, ”“Детский квартал” исемле интерактив тематик төрҙәрҙән торған биш  майҙансыҡ тәҡдим итә. Сара төбәк-ара Яҙыусылар союзы ағзалары ҡатнашлығында “Подиум” майҙансығында асыла.
    Фестиваль майҙансыҡтарында форумда ҡатнашыусылаҙы һәм форум ҡунаҡтарын яҙыусылар менән осрашыу, оҫталыҡ кластары, яңы сыҡҡан әҙәби баҫмаларҙың презентацияһын үткәреү кеүек саралар, егерме биштән ашыу төрлө-төрлө акциялар һәм, әлбиттә, китап күргәҙмәләре көтә.
    “Китап” нәшриәте китап һөйөүселәрҙе фестивалдә художестволы һәм балалар әҙәбиәте, яңы уҡыу-уҡытыу методик ҡулланмалар, дәреслектәр, төрлө белешмәләр, энциклопедиялар, һүҙлектәр һатыу күргәҙмәһе менән ҡыуандыра ала.