Мәскәү тамашасыһы билдәле балетмейстр Фәзи Ғәскәров сәхнәләштергән бейеүҙәрҙе ҡайнар сәләмләне. Хореографтың тыуыуына 110 йыл тулыуға бағышланған юбилей миҙгеле Петр Чайковский исемендәге концерт залында башланды.

Юбилей концертына ансамбль коллективы етди әҙерләнә. Алтын фондҡа ингән бейеүҙәрҙе яңынан сәхнәләштереү – ҙур яуаплылыҡ. Бейеүселәр әйтеүенсә, тулҡынланыу булһа ла, Мәскәү тамашасыһы һәр ваҡыт йылы ҡаршылай, шуға күрә концерт юғары кимәлдә һәм бер тынала үтә.

Ф. Ғәскәров исемендәге дәүләт академия халыҡ бейеүҙәре ансамбле 80 йылдан ашыу сағыу сығыштары менән ҡыуандыра. Юбилей йылы башҡаларынан үтә ныҡ айырылмай. Һуңғы ике йыл, пандемия арҡаһында күп үҙгәрештәр кисерергә тура килде, ти ансамбль етәкселеге. Ләкин бейеү коллективы гастролдәрен дауам итә. Быйыл Калининград, Ҡырым тамашасыларына сәхнә әҫәрҙәрен күрһәтеү маҡсаты ҡуйылған.

Фәйзи Ғәскәровтың тыуған көнөнә арналған саралар Өфөлә лә үтәсәк. 21 октябрь «Башҡортостан» дәүләт концерт залында ҙур байрам көтөлә.