Башҡортостан юлдаш телевидениеһы хәбәр итеүенсә, Ҡаҙағстанда «Тәңре рухы» заманса этник музыка фестивале тамамланды. Донъяның өс тиҫтәләп иле ҡатнашҡан күләмле сарала Башҡортостан исеменән «Ҡурайсы» төркөмө сығыш яһаны.

Опен-эйр, йә иһә асыҡ һауалағы концерт форматында үткән фестиваль меңдәрсә тамашасыны йыйҙы. «Тәңре FМ» милли радиостанцияһы авторлығындағы проектың төп ҡунаҡтары -Башҡортостандан. Роберт Юлдашев етәкселегендәге «Ҡурайсы» төркөмө фестивалде ябыу тантанаһында сығыш яһаны.  
Донъяның өс тиҫтәләп иленән ҡатнашҡан этник йүнәлештәге күләмле сарала «Ҡурайсы» төркөмө тәүге тапҡыр сығыш яһаны. Шуға ҡарамаҫтан Ҡаҙағстан тамашасыһы башҡорт халҡының билдәле ижади коллективы хаҡында хәбәрҙар булып сыҡты. 
5-се тапҡыр ойошторолған сарала быға тиклем беҙҙән «Арғымаҡ» этно-рок төркөмө һәм Халыҡ-ара конкурс-фестивалдәр лауреаты Екатерина Ямщикова ҡатнаша. «Тәңре рухы» фестивалендә тап боронғо һәм һәр халыҡтың үҙенә генә хас уйын ҡоралдарында сығыш яһауға баҫым яһалды. Милләттәр араһында мәҙәни күпер һалған тамашала башҡорт ҡурайынан ағылған моң барыһын да әсир итте.