Өфөлә, «Торатау» конгресс-холында, ҡурайҙа уйнау сәнғәтен һаҡлауға һәм үҫтереүгә арналған мөһим семинар уҙҙы. 4 мартта оҫталар һәм милли музыка ҡоралдарында уйнаусылар ошо үҙенсәлекле башҡорт музыка ҡоралын танытыу буйынса тәжрибә һәм фекерҙәр менән уртаҡлашыу өсөн йыйылды.

Республика халыҡ ижады үҙәгенең генераль директоры Салауат Кирәев етәкселегендә ойошторолған сара төбәктең Азат Айытҡолов, Юлай Ғәйнетдинов, Рәмил Ғәйзуллин, Дим Мөжәүиров, Ринат Рамазанов, Таһир Хәмитов кеүек танылған ҡурайсыларын, шулай уҡ мәҙәниәтте һәм сәнәғәтте үҫтереү өлкәһендәге эксперттарҙы берләштерҙе.

Сарала ҡатнашыусылар бик күп мәсьәләләрҙе, шул иҫәптән Дәүләт ҡурайсылар ансамбле эшмәкәрлеген, ҡурайҙа уйнауҙың традицион методикаларын, боронғо уйын ҡоралын төбәк бренды булараҡ танытыуҙың заманса юлдарын, башҡорт музыка мәҙәниәтен һаҡлауҙы, белем биреү учреждениеларында милли уйын ҡоралдарының ролен һәм халыҡ художество кәсептәрен үҫтереүҙе тикшерҙе. Башҡорт халҡының ошо үҙенсәлекле музыка ҡоралын һаҡлау һәм артабан үҫтереү мәсьәләләренә ҙур иғтибар бүленде.

Фекер алышыуҙа БР Сәнәғәт, энергетика һәм инновациялар министрлығының урман сәнәғәте комплексын һәм еңел сәнәғәтте үҫтереү кәңәшсеһе Эльза Чабрат һәм Республика халыҡ ижады үҙәгенең матди булмаған этномәҙәни ҡаҙаныштар менән эшләү бүлегенең төп методисы, РФ патенттары менән эшләү буйынса белгес Гүзәл Шәңгәрәева ҡатнашты. Уларҙың ҡатнашыуы башҡорт мәҙәниәтен үҫтереү өсөн тармаҡ-ара хеҙмәттәшлектең мөһимлеген һыҙыҡ өҫтөнә алды.

Семинар ҡурайсылар союзы ағзаларына танытма тапшырыу тантанаһы менән тамамланды.