Сибай тарих-тыуған яҡты өйрәнеү музейында «Ҡурсаҡтар батшалығы» күргәҙмәһе эшләй.

Быйыл март айында иғлан ителгән «Ҡурсаҡтар» конкурсына барлығы 225 эш ҡабул ителгән. Унда Сибай ҡалаһынан, Баймаҡ, Хәйбулла райондарынан, Ырымбур өлкәһенән, Омск ҡалаһынан һәммәһе 150 кеше үҙ оҫталығын һынап ҡарарға йөрьәт иткән. Ҡурсаҡтар төрлө материалдарҙан эшләнгән. Пряжа, туҡыма, ҡағыҙ, фомиран һәм башҡалар ҡулланылған. Уларҙың тәғәйенләнеше лә төрлө: ҡурсалаусы, йола үтәү өсөн кәрәклеһе, йәнһүрәт геройҙары һәм уйын ҡурсаҡтары.

Билдәле булыуынса, конкурс беренсе тапҡыр 2008 йылда үткәрелгәйне. Быйыл был сара Сибай башҡорттары ҡоролтайы башҡарма комитеты һәм ҡаланың тарих-тыуған яҡты өйрәнеү музейы тарафынан ойошторолдо. Бағымсы булараҡ ҡаланың «Алға Сибай» үҫеш йәмәғәт проекты (рәйесе Л.Г.Атанова), «Атмосфера» кинотеатрының директоры вазифаһын башҡарыусы О.В.Шеин, «AVON» косметика компанияһы вәкиле Светлана, «Ирәндек» йәмғиәт туристик фирмаһы рәйесе А.Ф.Кәримов, «Китап» магазины директоры Х.А.Аҡмырҙин сығыш яһаны. Улар еңеүселәр өсөн иҫтәлекле бүләктәр әҙерләгән.

«Ҡурсаҡтар батшалығы» күргәҙмәһе ҡалабыҙ музейында 25 ноябргә тиклем дауам итәсәк.

Сығанаҡ: “Атайсал” гәзите