Хөсәйен Әхмәтов исемендәге Башҡорт дәүләт филармонияһы хәбәр итеүенсә, республикабыҙҙа берҙән-бер көлкө театры «Ҡыҙыҡ менән Мәҙәк» төркөмө йәйге гастролдәргә сыға.

Концерттар 13 июндән 24-нә тиклем Баймаҡ, 4 июлдән 19-на тиклем республикабыҙҙың төнъяҡ-көнсығыш райондары - Ҡыйғы һәм Балаҡатайҙа үтәсәк. 

Башҡорт эстрадаһында көлдөргән, ҡайһы ваҡыт үҙенең сығышында күтәргән проблемалары менән уйландырған, көйҙөргән, яндырған да төркөмдә бөгөн береһенән-береһе талантлы, маһир артистар ижад итә. Хәмит Тләмов, Фаяз Йәнтүрин, Зөлфиә Әхмәтова, Ғәлиә Тимербулатова, Башҡортостандың атҡаҙанған артисы Рәмил Хажиев (йыр) һәм, әлбиттә,  төркөмдөң етәксеһе Башҡортостандың халыҡ артисы  Вәлит Илембәтовтар тамашасы күңелен күптән әсир иткән. Ҡайҙа ғына булманы, үҙенең көлкөлө тамашалары менән кемдең генә «ғүмерен оҙайтманы» «Ҡыҙыҡ менән Мәҙәктәр»!

Арыу-талыу белмәй,  күңел йылыһы, күтәренке кәйеф һағында тороусы «Ҡыҙыҡ менән Мәҙәктәр»ҙең өр-яңы программаларын Баймаҡ, Ҡыйғы һәм Балаҡатай райондарының түбәндәге ауылдарында күрергә мөмкин.