1 декабрь һуҡырҙар өсөн Башҡортостан республика махсус китапханаһында инклюзив арт-майҙан асыла. Сара барышында ике күргәҙмә эшләйәсәк. Тигеҙ мөмкинселектәр менән, сәнғәт юлын әле генә башлаусы профессионалдарҙың һәм күреү һәләте яғынан һаулығы сикле кешеләрҙең эштәре тәҡдим ителәсәк.
Халыҡ-ара инвалидтар көнөн билдәләү рамкаһында,  “Тәбиғәт һәм беҙ” күргәҙмәһе эшләйәсәк. Был эштәр, күреү һәм ишетеү һәләтенән бер үк ваҡытта мәхрүм ителгән китап уҡыусыларҙыҡы. Бисер, сепрәк, ағас, тәбиғи материалдар ҡулланып башҡарылған.
“График мозаика” күргәҙмәһе лә ошо уҡ көндә асыҡ буласаҡ. Бында М. Аҡмулла исемендәге Башҡорт дәүләт педагогия университеты Художество-график факультеты студенттарының, төрлө йылдарҙа, графика техникаһы менән башҡарған, ижади конкурс эштәре тәҡдим ителә.
График эштәргә Иҫке Өфө, билдәле әҙәби әҫәр, натюрморт темалары һалынған. Һүрәттәрҙәге аҡлы-ҡаралы контраст, насар күргәндәргә ижадты ҡабул итеү өсөн еңеллек тыуҙыра. Экспозицияла рельеф эштәр ҙә бар. Линогравюралар өсөн штамптар линолеумда башҡарлыған. Күргәҙмәгә килеүселәр, улар менән тактиль рәүештә лә таныша ала.
Аҡ ҡағыҙҙа ҡара һыҙыҡтар, таптар менән эшләнгән композициялар эмоциональ көсөргәнеш тыуҙыра, гравюларҙың ҙур декоративлығын билдәләй.
Инклюзив арт-майҙан 14:00 сәғәттә, Өфө ҡалаһы, Киров урамы, 47 адресы буйынса асыла.