Башҡортостан юлдаш телевидениеһы хәбәр итеүенсә, Әбйәлил районының Ҡаҙмаш ауылында мәҙәни-ял итеү үҙәге асылды.

Объектты төҙөү башланғысын урындағы халыҡ былтыр яҙ район етәкселеге менән осрашыуҙа күтәреп сыҡҡайны. Ул ваҡытта «Һаумыһығыҙ, ауылдаштар!» байрамына әҙерлек барышында ҡаҙмаштар клуб мәсьәләһен хәл итеүҙе һораны. Тәүге йылда райондан бүленгән финанс ярҙамға үҙәктең бинаһы ҡалҡып сыҡҡан һәм ҡыйығы ябылған. Быйыл иһә эстә биҙәкләү эштәре башҡарылған һәм кәрәкле ҡорамалдар һатып алынған.  

Урындағы халыҡ рәхәтләнеп ял итһен, ваҡытын файҙалы үткәрһен өсөн үҙәктә барлыҡ шарттар ҙа тыуҙырылған. Ярты быуат элек «Һаумыһығыҙ, ауылдаштар!» байрамына нигеҙ һалыусы төбәктә бөгөн 700-гә яҡын кеше йәшәй. Ауыл йылдан-йыл үҫә, матурая бара, йәштәр ҙә күберәк ҡалырға тырыша.