Өфө ҡалаһының тарихы музейы баш ҡалабыҙға «Хеҙмәт ҡаһарманлығы ҡалаһы» исемен биреү тураһында ҡултамғалар йыя башланы.

Бөйөк Ватан һуғышы йылдарында Өфө илдең мөһим тыл үҙәгенә әйләнә. Бында бик күп дәүләт ойошмалары, хатта Коммунистик интернационал башҡарма ккомитеты күсерелә. 40-ҡа яҡын сәнәғәт предприятиелары эвакуациялана.

Өфө халҡы һуғыш техникаһын һәм ҡоралдар етештереү өсөн ҙур өлөш индерҙе. Шулай уҡ улар йыйған иғәнәгә «Башҡорт истребителе», «Башҡортостан нефтсеһе», эскадрильялары, БАССР-ҙың 25 йыллығы исемендәге авиаподразделениеһы, «Башҡортостан элемтәсеһе», «Башҡортостан пионеры» танк колонналары дошманға ҡаршы көрәште.

Хәҙер Өфө халҡы Бөйөк Еңеүҙе яҡынайтыуға ҙур өлөш индергән туғандарының исемен мәңгеләштерә ала.

14 йәштән өлкән республиканың барлыҡ кешеләре акцияла ҡатнаша һәм ҡултамғаһын музейҙа ҡалдырырға мөмкин.