Рәсәйҙең Театр эшмәкәрҙәре союзы грантын тормошҡа ашырыу ниәтенән Өфөгә театр тәнҡитсеһе, сәнғәт белгесе, МХАТ мәктәп-студияһы профессоры Ольга Егошина килде.

 Тәнҡитсе Мәжит Ғафури исемендәге Башҡорт академия драма театрының "Ай тотолған төндә" (М.Кәрим, режиссеры - Айрат Абушахманов), "Прометей" (М.Кәримдең "Ташлама утты, Прометей!.." пьесаһы буйынса, режиссеры - Илсур Ҡаҙаҡбаев), "Зөләйха күҙҙәрен аса" (Г.Яхина, Я.Пулинович, режиссеры - Айрат Абушахманов) спектаклдәрен ҡараны.

Ҡараған спектаклдәргә фекер алышыу үтте. «Ошо өс көн эсендә мин "ҡәҙимге өйрәнелгән тулҡындарҙан" ситтә йәшәүем өсөн һеҙҙең театрға рәхмәтлемен. Мәжит Ғафури исемендәге Башҡорт академия драма театры минең өсөн – ул ҙур формалағы, оло фекерле, хәрәкәтсән театр. Был театрҙа профессионалдар эшләй. Һеҙҙең труппала өлкән быуын актерҙарының булыуы бик яҡшы, сөнки йәштәр өсөн улар ориентир булып торалар, улар – йәштәргә таяныс та. Ә йәш артистар – улар шул тиклем һығылмалы, үҙ ролдәрен шул тиклем бирелеп, оҫта уйнай.
Мине бигерәк тә һеҙҙең тамашасылар таң ҡалдырҙы, улар еңелсә спектаклдәргә ҡарағанда ҡатмарлы спектаклдәрҙе лә ҡарарға әҙерҙәр. Улай ғына ла түгел – улар актерҙарға хөрмәт күрһәтә беләләр һәм спектаклдән һуң оҙаҡ ҡына аяғүрә баҫып һеҙгә ҡул сабалар.
Шулай уҡ һеҙҙең театр режиссерҙарҙан уңған - Айрат Абушахманов һәм Илсур Ҡаҙаҡбаев - улар икеһе ике төрлө булыуға ҡарамаҫтан, уларҙы үҙҙәре ҡуйған спектаклдәрҙәге кешеләр араһындағы мөнәсәбәттәр бөйөклөгө берләштерә", тине Ольга Егошина.