«Башинформ» мәғлүмәт агентлығы хәбәр итеүенсә http://www.bashinform.ru/bash/968141/, Өфөлә 18 мартта автор йырын үҫтереүгә айырыуса өлөш индергән өсөн «Күңел ҡылдары» республика премияһын тапшырыу тантанаһы үтә. Сәхнәгә республикала һәм илебеҙҙә билдәле бард йырсылары, Өфө тамашасыһы һөйөүен яулап алған авторҙар һәм башҡарыусылар сығасаҡ, тип хәбәр итте ойоштороусылар – «Аҡ ҡарға» автор йыры клубы ағзалары.

Сара Октябрҙең 50 йыллығы урамы, 21 адресы буйынса Йәштәр һарайында (элекке «Юбилейлы» мәҙәниәт һарайында) киске 7-лә башлана.

«Күңел ҡылдары» премияһы тәү тапҡыр былтыр 19 мартта Йәштәр һарайында Наил Мәхмүтов китабының презентацияһы сиктәрендә уҙҙы.

Ул саҡта «Башҡортостан Республикаһында автор йырын үҫтереүгә өлөш индергән өсөн» номинацияһында биш кеше еңеүсе булды. Бына улар – «ДДТ» төркөмө лидеры Юрий Шевчук, Өфөнөң билдәле бард йырсылары Николай Грахов, Лев Малых, тарихсы һәм крайҙы өйрәнеүсе Сергей Круль һәм «Аҡ ҡарға» клубы президенты, Башҡортостан Республикаһы Нефть химияһы һәм эшкәртеү институты директоры Элшад Теләшев.

«Беҙҙә башҡорт бард йырында үҙенең «Оскары» юҡ. Бард өсөн иң символиклы ҡорал – ул гитара. Йыл һайын иң билдәле, уңышлы авторҙарға был премияны тапшырырға ҡарар иттек. Рәмил Бәҙәмшин уға «Күңел ҡылдары» тигән исем уйлап тапты. Тәүге премияны Юрий Шевчукка тапшырырға ҡарар иттек – ул беҙҙең иң билдәле бард йырсыбыҙ, уның ярҙамында Өфөнө беләләр», тине Наил Мәхмүтов.