Өфөлә 1 июндә, Халыҡ-ара балаларҙы яҡлау көнөндә, «Kids Rock Fest» тигән балалар рок-фестивале ойошторола Ул «Ғаилә һәм ҡала— бергәләп үҫәбеҙ» байрамы барышында уҙғарыла. Өфө хакимиәтенең матбуғат хеҙмәтендә хәбәр итеүҙәренсә, сараны Салауат Юлаев исемендәге майҙанда үткәреү планлаштырыла.

«Был урамда үҙенсәлекле музыка фестивале форматында яңы ғаилә ялы йолаларын булдырыусы сағыу ваҡиға. Уның маҡсаты һәм бурысы – ҡалала парк мәҙәниәтен үҫтереү, сәләмәтлек мөмкинлектәре сикләнгән һәм аҙ тәьмин ителгән ғаиләләрҙәге балалар өсөн уңайлы мөхит булдырыу, балалар һәм ата-әсәләр өсөн берләштереүсе мәҙәни киңлек ойоштороу, музыкаль, мәғариф һәм башҡа ижади башланғыстарҙы үҫтереү, шулай уҡ йәш рок-музыканттар өсөн шарттар тыуҙырыу», — тип аңлатма бирҙеләр Өфөнөң Киров районы хакимиәтендә.

Ғаилә форматындағы сарала балалар һәм үҫмерҙәр ваҡиғаның төп ҡатнашыусылары һәм тамашасылары булыр, тип көтөлә. Музыка төркөмдәре сығыш яһаясаҡ, оҫталыҡ дәрестәре уҙасаҡ. Махсус ҡунаҡ — The BeatLove. Балалар рок стилендә сәстәрен ҡуйып, биттәрен биҙәй аласаҡ. Инеү ирекле. Сара иртәнге сәғәт 11-ҙән киске 8-гә тикем барасаҡ.

Сығанаҡ: http://www.bashinform.ru