30 ноябрҙә һәм 1 декабрҙә «Башҡортостан» дәүләт концерт залында «Башҡорт йыры-2018» телевизион конкурсының лауреаттары һәм финалистары ҡатнашлығында гала-концерт үтәсәк. Шулай уҡ, сарала Башҡортостандың һәм Татарстандың билдәле эстрада йондоҙҙары ҡатнашасаҡ.
Ете йыл эсендә телепроектта биш йөҙҙән ашыу йырсы ҡатнаша. Быйыл илле кеше үҙ көсөн һынап ҡарарға теләк белдерә. Финалға яртыһынан күберәк йырсы барып етә. Республиканың төрлө район-ҡалаларынан 18 – 40 йәшлек йырсылар, профессионалдар һәм үҙешмәкәрҙәр бер урынға йыйыла.
Конкурста ҡатнашыусылар өс һынау үтә. Улар башҡорт халыҡ, эстрада һәм ретро йырҙарҙы тамашасылар һәм баһалама ағзалары иғтибарына сығара. Гала-концерт программаһына иң көслө композициялар инә. Еңеүселәрҙе билдәле композиторҙар һайлай, шулай уҡ, Башҡортостан Юлдаш телеканалы сайтында онлайн-тауыш биреү ойошторола.
«Башҡорт йыры» – йылдан-йыл яңы таланттар аса. Гала-концерттың телеверсияһын Яңы йыл кисендә, 31 декабрҙә, Башҡортостан Юлдаш телевидениеһында ҡарарға мөмкин буласаҡ.