11 апрелдә Башҡорт дәүләт академия опера һәм балет театрының Кесе залында күренекле башҡорт шағиры Шәйехзада Бабичтың тыуыуына 130 йыл тулыуға арналған «Йырла, йырсы...» концерты була.

Ҡыҫҡа ғына ғүмере эсендә Шәйехзада Бабич башҡорт әҙәбиәтендә юйылмаҫ эҙ ҡалдырған. Уның шиғырҙары, балладалары, эпиграммалары һәм фельетондары, шулай уҡ сәхнә эшмәкәрлеге башҡорт халҡының рухи тормошонда мөһим ваҡиғаға әүерелде. Шағирҙың бер нисә йыл эсендә генә баҫылған әҫәрҙәре тәрән хистәр, тыуған иленә һөйөү менән һуғарылған, күптәре заман ваҡиғаларына арналған һәм туған халҡына төбәлгән. Үҙе иҫән саҡта донъя күргән «Йәш Башҡортостан. Зәңгәр йырҙар» (1918) тигән берҙән-бер йыйынтығы башҡорт шиғриәтенең ысын хазинаһына әйләнә.

Концерт программаһында күренекле башҡорт композиторҙарының Шәйехзада Бабич шиғырҙарына яҙған әҫәрҙәре яңғыраясаҡ. Хәҙерге авторҙар хәтер кисәһе өсөн махсус рәүештә яңы йырҙар һәм романстар ижад итәсәк.

Кисәлә Башҡортостандың халыҡ артистары Әлфиә Кәримова, Әлим Ҡәйүмов, Башҡортостандың атҡаҙанған артисы Айгиз Ғиззәтуллин, билдәле артистар Иҙел Аралбаев, Эльвина Әхмәтханова, Айтуған Вәлмөхәмәтов, Рим Рәхимов, Артур Ғайсаров (ҡурай), Сино Мәхмүдов (скрипка), шулай уҡ театрҙың хор коллективы ҡатнаша.

Бабич шиғырҙарын актёр Илгиз Таһиров уҡый. Концертмейстер – Эльвина Аҡбаева.