12 декабрҙә Арт-квадратта «Башҡорт теленә яңы ҡараш» тип аталған сара ойошторола. Уның барышында башҡорт телен популярлаштырыу буйынса проекттарҙың презентацияһы була.

Сара офлайн һәм онлайн уҙғарыла: коронавирус пандемияһы шарттарында бөтәһен дә бер майҙансыҡҡа йыйыу мөмкин түгел. Проект авторҙары, йәмәғәтселек фекере лидерҙары туранан-тура ҡатнаша, ә киң аудиторияға Башҡортостан юлдаш телеканалында һәм социаль селтәрҙәрҙә тура трансляция ойошторола.

Унда ҡатнашыусылар башҡортса-русса һәм русса-башҡортса тәржемәсенең яңы веб-порталы, башҡорт телен өйрәнеү өсөн мобиль ҡушымталар, «Аҫылташ» бренды тураһында мәғлүмәт алырға мөмкин.

Ойоштороусылар – Башҡорт телен һаҡлау һәм үҫтереү фонды. Махcус ҡунаҡ – йәш ҡурайсы Юлай Ҡасимов.