3 февралдә Нәжиб Асанбаев пьесаһы буйынса ҡуйылған "Ҡыҙыл паша" спектакленең премьераһы алдынан, М.Ғафури исемендәге Башҡорт дәүләт академия драма театры фойеһында Кәрим Хәкимовтың мемориаль музейы тарафынан "Кәрим Хәкимов - Кремлдең ғәрәп вәзире" күргәҙмәһе ойоштороласаҡ.

Экспозицияла Кәрим Хәкимовтың Хиджаз, Неджд Короллегендәге һәм уларға ҡушылған өлкәләрҙәге дипломатик миссияһын сағылдырған фотоматериалдар, документтар, шулай уҡ, дипломатҡа арналған китаптар тәҡдим ителәсәк. Тамашасылар Кәрим Хәкимовтың шәхси әйберҙәрен дә күрә аласаҡ.

Дөйөм алғанда, күренекле совет дипломаты, ғәрәп илдәрендә СССР-ҙың тәүге тулы хоҡуҡлы вәкиле, йәш Совет Республикаһы һәм ғәрәп-фарси донъяһы араһында яҡшы мөнәсәбәттәр урынлашыуға ҙур өлөш индергән Кәрим Әбдрәүеф улы Хәкимовтың тормошон һәм эшмәкәрлеген раҫлаған 20-нән артыҡ һирәк, уникаль экспонат һәм артефакттар ҡуйыласаҡ.

Театр музейы Нәжиб Асанбаевтың киң билдәле тәүге "Ҡыҙыл паша" спектакленә (режиссеры - Лек Вәлиев, 1982 йыл) арналған экспозиция тәҡдим итәсәк.

Иҫегеҙгә төшөрәбеҙ, 2021 йылдың декабрендә БР Башлығы Радий Хәбиров эш сәфәре менән Бишбүләк районына барҙы, шул ваҡытта Кәрим Хәкимовтың мемориаль музейы менән дә танышты. Шул ваҡытта республиканың мәҙәниәт министрлығына  "Ҡыҙыл паша" спектаклен ҡабаттан сәхнәгә ҡуйыу тураһында бойорҙо. Һәм уның һүҙе тормошҡа ашырылды - иртәгә, 3 февралдә Башҡорт драма театрында спектаклдең премьераһы буласаҡ.