Кисә, йәғни 12 апрель көнө «Башҡортостан» дәүләт концерт залында республиканың Милли симфоник оркестрының 25 йыллығына арналған Халыҡ-ара музыка фестивале асылды. Фестивалде асыу тантанаһында Башҡортостан Башлығы Рөстәм Хәмитов ҡатнашты.

Тәүге фестиваль концертының симфоник программаһы Н.А Римский-Корсаков һәм Сергей Рахманиновтың әҫәрҙәренән торҙо. С. Рахманинов оркестры менән фортепиано өсөн 3-сө концертта Рәсәйҙең атҡаҙанған артисы Борис Березовский соло башҡарҙы. Башҡалаға донъяның танылған һәм билдәле пианисы Борис Березовскийҙы Милли симфоник оркестрҙың баш дирижёры Раушан Яҡупов саҡырған.

«Музыка –ул тел кеүек, әгәр ҙә бала-саҡтан ишетеп,  тыңлап үҫһәң, ул һиңә аңлайышлы ғына түгел, я туған телең кеүек яҡын буласаҡ. Музыка – ул тағы ла хис, тойғо һәм кисереш. Ғаиләбеҙҙә музыка менән шөғөлләнеү традицияға әйләнеп китте. Мин был шөғөлдө артабан да дауам итә алыуыма сикһеҙ шатмын. Музыка – ул боронғо һөнәрҙәрҙең береһе, ул мәңгелек”, - ти Рәсәйҙең атҡаҙанған артисы Steinway Artist Борис Березовский.

 «Бөгөнгө фестивалдә ҡатнаша алыуыма сикһеҙ шатмын. Классик музыкала синтез темаһына һанап бөткөһөҙ вариациалар булыуын билдәләп үтәһем килә. Әйтәйек, фольклор менән поп һәм рок музыканы берләштергән коллективтар бар. Ысын фольклор һаҡлаусылар бик аҙ ҡалған. Классик музыкала булған полифония, импровизация хор йырында –миҫал булып һанала. Ул музыка  күңел өсөн. Һәр милләттең үҙ күңел музыкаһы бар», – ти Борис Вадим улы.

Башҡортостан Республикаһының Милли симфоник оркестры 1992 йылда барлыҡҡа килгән. Тәүге художество етәксеһе һәм баш дирижёры, оркестрҙы ойоштороуҙа ҙур көс һалыусы Таһир Таузах улы Камалов. 2015 йылдан алып бөгөнгәсә  коллектив «Башҡортостан» дәүләт концерт залында эшләй.

Оркестрҙа барлығы 115 кеше иҫәпләнә, шуларҙың 89 музыкант. Заһир Исмәғилев исемендәге Өфө дәүләт сәнғәт институтын, Н.А. Римский-Корсаков исемендәге Санкт-Петербург дәүләт консерваторияһын, П.И. Чайковский исемендәге Мәскәү дәүләт консерваторияһын тамамлаған өс дирижёр эшләй. Әлеге ваҡытта республикабыҙҙың Милли симфоник оркестрының баш дирижёр вазифаһын Раушан Яҡупов башҡара.

Мәҙәни проекттарҙы тормошҡа ашырыу өсөн бирелгән Башҡортостан Башлығы гранты ярҙамында ойошторолған Халыҡ-ара музыка фестивале 23 апрелгә ҡәҙәр дауам итә.

 Гүзәл Багаева