Кисә, 27 ноябрҙә Конгресс-холл сәхнәһендә сағыу тамаша – «Miss International Ufa» этник гүзәллек һәм һәләт республика конкурсы уҙҙы. Төрлө милләт ҡыҙҙары Өфөлә йәшәүселәрҙе үҙ мәҙәниәте менән таныштырҙы.
«Miss International Ufa – 2018» исемен Тажикстан вәкиле Раъно Оморҙаҡова яуланы. Беренсе вице-мисс – Грузиянан Карина Ахвледиани, ә икенсе вице-мисс тажын Башҡортостандан Нәркәс Аралбаева алды.
Сараны ойоштороусылар: Башҡортостандың Халыҡтар дуҫлығы йорто һәм Мәҙәниәт министрлығы. Проект авторы Земфира Рәшитованың быйыл йәй «Таврида» форумында алған грант аҡсаһына үткәрелде.
«Miss International Ufa» этник-ара матурлыҡ һәм һәләт конкурсы тәүге тапҡыр ойошторолдо һәм төрлө ил, Рәсәй халыҡтары вәкилдәрен бер урынға йыйҙы. Финалсылар араһында – Адыгей, Мысыр, Грузия, Тажикстан, Ҡаҙағстан, Нигерия ҡыҙҙары, шулай уҡ удмурт, сыуаш, башҡорт, татар, рус милләте вәкилдәре. Һылыуҡайҙар туған телендә үҙҙәре хаҡында һөйләне, халыҡ йырҙарын йырланы һәм милли бейеүҙәрен күрһәтте.