«Башинформ» мәғлүмәт агентлығы хәбәр итеүенсә, бөгөн- 1 мартта, Башҡортостандың Яҙыусылар союзында уҙған йылда сыҡҡан «Кабир Туйкин и его наследие» китабының исем туйы үтә. Уның авторы – яҙыусының ейәнсәре Раилә Туйкина.

Кәбир Туйкин – ХХ быуатта башҡорт һәм татар мәҙәниәте тарихында лайыҡлы урын ҡалдырған мәғрифәтсе, күренекле уҡытыусы, яҙыусы. Был үҙ заманы өсөн танылған кеше Сталин репрессиялары ҡорбаны була – 1938 йылдың февралендә ялған ғәйепләү буйынса атып үлтерелә, һуңынан кире аҡлана.

Китаптың авторы тотош академия институтын тикшереү менән тиң ғәйәт ҙур эш башҡарған. Биш йыл дауамында ул архивтарҙа эшләгән, олатаһының башҡортса һәм татарса әҫәрҙәрен, уның шиғырҙарын һәм хикәйәләрен үҙе рус теленә тәржемә иткән. Күп кенә материалдар тәүгә донъя күрҙе.

Сара Кәбир Туйкиндың тыуыуына 140 йыл тулыуға арналған.

Осрашыу Өфө ҡалаһы, Коммунистик урамы, 34 адресы буйынса үтә.

Инеү ирекле. Башлана көндөҙгө сәғәт 3-тә.