Рәсәй Федерацияһы Президентының  1111 һанлы «Мәҙәниәт хеҙмәткәрҙәре көнө тураһында» Указына ярашлы 2007 йылдың 27 августынан алып 25 март-Мәҙәниәт хеҙмәткәрҙәре көнө булараҡ һәр йыл да билдәләнеп килә.

Бөгөн, 23 март көнө,Мәҙәниәт хеҙмәткәрҙәре көнө алдынан Хөсәйен Әхмәтов  исемендәге Башҡорт дәүләт филармонияһында мәҙәниәт һәм сәнғәт өлкәһендә фиҙаҡәр хеҙмәт итеүселәрҙе тантаналы рәүештә ҡотлап үттеләр.

 Башҡортостан Республикаһы Хөкүмәте һәм Мәҙәниәт министрлығы исеменән ҡотлау һүҙҙәре менән Мәҙәниәт министры Әминә Шафиҡова сығыш яһаны, наградалар тапшырҙы.

Башҡортостан Республикаһы Хөкүмәтенең Маҡтау грамоталары менән Өфө “Нур” татар театры актерҙары,  Рәсәй Федерацияһының атҡаҙанған,  Башҡортостан һәм Татарстан Республикаларының халыҡ артисы Сәүиә Сираеваға, Рида Фахрисламоваға, Альберт Шәрәфетдиновтар  бүләкләнде.

Рәсәй Федерацияһының Мәҙәниәт министрлығы ҡарары менән Салауат ҡалаһының “Ағиҙел” халыҡ бейеүҙәре ансамбленә “Атҡаҙанған халыҡ ижады коллективы” тигән исем бирелде.

Башҡортостан Республикаһының Мәҙәниәт министрлығы ҡарары менән Учалы ҡалаһынан “Ҡорама” башҡор халыҡ театрына “Башҡортостан Республикаһының атҡаҙанған халыҡ ижады коллективы” исеме бирелде. Мәртәбәле баһаға “Урал” галереяһы эргәһендә эшләп килгән “Надежда” клубы, Мәләүездең Ҡала Мәҙәниәт һарайының  халыҡ тынлы оркестры, Сибай балалар музыка мәктәбенең “Ирәндек” ҡурайсылар ансамбле, Стәрлетамаҡ Ҡала мәҙәниәт һарайының “Ашҡаҙар нағыштары” башҡорт халыҡ фольклор ансамбле, Ҡырмыҫҡалы районының “Далан” хореографик ансамбле, Белорет Ҡала Мәҙәниәт һарайының “Виват” халыҡ  хор капеллаһы лайыҡ булды.

Шулай уҡ мәҙәниәт һәм сәнғәт өлкәһендәге ҡаҙаныштары өсөн БР Милли музейы, Өфө “Нур” татар театры, Республика хәрби дан музейы, Һуҡырҙар өсөн махсус китапхана, Рус дәүләт академия драма театры, Халыҡтар дуҫлығы йорто  Мәҙәниәт министрлығы тарафынан айырым билдәләнеп үтте, етәкселәргә Маҡтау ҡағыҙҙары тапшырылды.

Гүзәл Багаева