Рәми Ғариповҡа ҡуйылған бюст янында уҙған сарала БР Хөкүмәт Премьер-министры урынбаҫары Азат Баҙранов, рәсми вәкилдәр, башҡорт интеллегенцияһыһәм шағирҙың балалары, ейәндәре ҡатнашты.

Хәтер сараһы "Сыңрау торна" көйө менән асылды. Гимназистар башҡарыуында шағирҙың шиғырҙары яңғыраны.

"Интернаттың 1950 йылғы сығарылыш уҡыусыбыҙ Рәми Ғарипов исемен йөрөтөү - беҙҙең гимназия өсөн ҙур яуаплылыҡ.- тине Р.Ғарипов исемендәге БРГИ директоры Илнур Сәлихов.

БР Хөкүмәт Премьер-министры урынбаҫары Азат Баҙранов:

"Рәми Ғарипов шиғриәте башҡорт поэзияһын юғары кимәлгә күтәргән әҙип. Уның иҫтәлеген мәңгеләштереү буйынса байтаҡ эштәр башҡарыла. Бөгөн уның шиғырҙары Рәсәй актерҙары уҡыуында ла яңғыраны. Гөлнара Рәми ҡыҙы менән шағирҙың архивын заманса сараларға күсереү хаҡында һөйләштек. З.Биишева исемендәге "Китап" нәшриәтендә быйыл Рәми Ғариповтың 5 китабы донъя күрәсәк".

Сарала БР Яҙыусылар Союзы рәйесе Зәки Әлибаев, "Ағиҙел" журналының баш мөхәррире, яҙыусы Мөнир Ҡунафин һәм "Февраль. Буран" спектаклендә төп ролде башҡарыусы актерҙарҙың береһе Артур Кәбиров, шағирҙың балалары сығыш яһаны. Әйткәндәй, Мөнир Ҡунафин һәм Артур Кәбиров - гимназияның төрлө йылдарҙағы сығарылыш уҡыусылары.