Ә 10 февралдә Хөсәйен Әхмәтов исемендәге Башҡорт дәүләт филармонияһында Башҡортостандың халыҡ артисы, БАССР-ҙың атҡаҙанған артисы, Бөтә Рәсәй конкурстары лауреаты Ишморат Илбәковтың ҙур юбилей концерты үтте.

Ишҡурайҙың серен асып, башҡорт халыҡ көйҙәренән тыш, татар, йәһүд, урыҫ һәм башҡа халыҡ моңдары яңғыраны, төрлө попуррилар күңелдәрҙе асты.Тамашасы тыңлап ҡына ҡалманы, бейене, ҡушылып йырланы, аяҡ-үрә тороп алҡышланы.

Концерт барышында Башҡортостан Республикаһы Башлығы Радий Хәбировтан да ҡотлау хаты еткерелде.

Артисты күркәм юбилейы менән ҡотларға Башҡортостан Республикаһының мәҙәниәт министры урынбаҫары Илнур Мөхйәнов килде.

- Үҙегеҙҙең эшләү осоронда һеҙ беҙҙең милләтебеҙҙе, мәҙәниәтебеҙҙе республикала ғына түгел, бөтә донъя кимәлендә таныттығыҙ, ҙурланығыҙ. Бар эшләгән хеҙмәтегеҙ өсөн һеҙгә оло рәхмәт!- тине Илнур Илдар улы һәм Ишморат Ҡәйүм улын Башҡортостандың музыка сәнғәте үҫешенә тос өлөш индергәне өсөн Почет грамотаһы менән бүләкләне.

Ишморат Илбәков булған илдәрҙә ҡурай менән барыһы ла ҡыҙыҡһынған. Шуларҙың береһе – Ҡаҙағстан. Унда артистың уҡыусылары ла күп кенә. Кисәгә Ҡаҙағстандан сәнғәт академияһы профессорҙары Ҡайырғазы Туленов менән Темербек Джургенов килде. Улар юбилярҙы ҡаҙаҡ милләтенең сәнғәте үҫешенә өлөш индергәне өсөн миҙал менән бүләкләне.

Үҙенең тыуған яғы Хәйбулланан алыҫ юлды яҡынайтып килеүсе район хакимиәте башлығының беренсе урынбаҫары Илмир Ҡотоев Хәйбулла районы исеменән рәхмәт хатын тапшырҙы һәм район мәҙәниәте идаралығы етәксеһе Лариса Мәмбәтова “Һаҡмар” шифаханаһына ял итеү сертификаты менән бүләкләне. “Түнгәүер” халыҡ ҡоралдары ансамбле менән бик күп конкурстар лауреаты Зәбирә Әбсәләмова музыкаль сәләм дә алып килгәйне.

Кисәлә филармония ҡурайсылар ансамбле һәм солистары, Башҡорт дәүләт академия драма теары актрисаһы Светлана Хәкимова, Ҡаҙағстандан уҡыусыһы Ауялым Ҡунанбаева, Татарстандан Зөлфиә һәм Жәүит Шакировтар сығыш яһаны.