Башҡортостан Республикаһының Милли музейында танылған яҙыусы, Башҡортостандың атҡаҙанған мәҙәниәт эшмәкәре, Рамазан Өмөтбаев, Жәлил Кейекбаев, Мөхәмәтша Буранғолов һәм республика ваҡытлы матбуғат премиялары лауреаты Лира Якшибаева менән ижади осрашыу уҙҙы.

Кисәнең әҙибәнең тыуған көнөндә һәм уның республиканың юғары наградаһына – “Башҡортостандың атҡаҙанған мәҙәниәт эшмәкәре” исеменә лайыҡ булған көндә үтеүе барыһына ла байрам кәйефе өҫтәне.

Сараға яҙыусының ижадын һөйөүселәр, башҡорт әҙәбиәтен яратыусылар, әҙибәнең ижадташ дуҫтары, фекерҙәштәре, студенттар һәм шәкерттәр йыйылды. Кисәлә Лира Миңләхмәт ҡыҙының «Бөтәбеҙгә бер Ер шары» әҫәрендә күтәрелгән темалар хаҡында һүҙ барҙы. Ғаилә ҡиммәттәре, йәшлек илаһилығы, ир менән ҡатын, ата-әсә һәм балалар мөнәсәбәте, етемлектең ауыр ғазаптары кеүек актуаль темаларҙы сағылдырған, шулай уҡ тыуған ерҙе һөйөргә һәм уны һаҡларға саҡырған әҫәр һәр ваҡытта ла актуаль булып ҡаласаҡ, тигән уртаҡ фекергә килде әҙәби кисәлә ҡатнашыусылар.

Осрашыу барышында матур әңгәмә ҡоролдо, яҙыусы әҫәре буйынса һорауҙарына дөрөҫ яуаптар биргән ҡунаҡтарға китабын бүләк итте. Кисә ҡурай моңона, матур йырҙарға сорналып барҙы.

Кисә һуңында Башҡортостан Милли музейының күргәҙмә залдары буйлап ойошторолған экскурсия барыһының да күңеленә хуш килде.

Ошондай әҙәби кисәләр, ижади осрашыуҙар яҙыусыларға ла, уның ижадын күҙәтеп барыусыларға ла һәм, иң мөһиме, йәш быуынға файҙалы. Әҙиптәр бындай осрашыуҙар барышында үҙ уҡыусыларын нимә борсоғанын белә, аудиторияһы менән осраша, уларҙың фекерҙәрен ишетә, артабанғы йүнәлешен билдәләй, ә ҡунаҡтар иһә яҙыусы менән күҙмә-күҙ ҡарашып аралашыу мөмкинлеге ала.

Башҡортостан Республикаһы Милли музейында әйтеүҙәренсә, бындай фәһемле әҙәби кисәләр киләсәктә лә уҙғарылып торасаҡ.