13 февралдә Башҡортостандың Милли әҙәбиәт музейы күренекле дәүләт эшмәкәре, РСФСР-ҙың атҡаҙанған мәҙәниәт хеҙмәткәре, Башҡортостан Республикаһының Салауат Юлаев исемендәге дәүләт премияһы лауреаты һәм Бөйөк Ватан һуғышында ҡатнашҡан фронтовик яҙыусы Яныбай Хамматовтың тыуыуына 100 йыл тулыуға арналған күргәҙмә ойоштора.

Күргәҙмәнең иң үҙенсәлекле экспонаттары тип яҙыусының «Төньяҡ амурҙары», «Һырдаръя» романдарының ҡулъяҙмаларын атарға мөмкин. Улар авторҙың әҙәби идеяларының нисек формалашыуын һәм ижад иткәндә әҫәрҙәренең ниндәй үҙгәрештәр кисереүен тәрәнерәк аңларға ярҙам итәсәк. Ҡарамаларҙы текстың һуңғы варианттары менән сағыштырыу авторҙың эш ысулын һәм һүҙгә ҡарата мөнәсәбәтен сағылдырыр.

«Soberano» аккордеоны ла ҡыҙыҡлы экспонат булмаҡсы, яҙыусы һуғыштан һуң уны йыш ҡулына алып уйнар булған. Был музыка ҡоралы шул дәүерҙең һулышын тойорға ярҙам итер, Яныбай Хамматовтың ижадында музыка менән әҙәбиәт араһындағы бәйләнеште лә билдәләр.

Шулай уҡ "Бөртөкләп йыйыла алтын" китабы өсөн Урал ташынан футляр иғтибарға лайыҡ. Был эксклюзив предмет китапты һаҡлап ҡына ҡалмай, шулай уҡ Яныбай Хамматовтың ижади мираҫының ныҡлығын һәм бөйөклөгөн һынландыра.

Өфөлә күргәҙмә Мәжит Ғафуриҙың мемориаль йорт-музейында урынлашасаҡ, шулай уҡ йыл дауамында Милли әҙәбиәт музейының күсмә күргәҙмәһе булараҡ эшләйәсәк. Ошо уҡ исем аҫтында музей дәресе әҙерләнә, ул Башҡортостандың төрлө уҡыу йорттарында үткәреләсәк.

Адресы: Өфө ҡалаһы, Гоголь урамы, 28/1.