Бөгөн, 25 июлдә "Һынлы сәнғәт ҡомартҡылары" тип исемләнгән Башҡортостандың милли музей фондынан алынған картиналар күргәҙмәһе эш башланы. Билдәле рәссамдарҙың һәм уларҙың уҡыусыларының әҫәрҙәре Башҡортостандың тарихи- мәҙәни мираҫын тәшкил итә. Сәнғәт һөйөүселәр Ҡасим Дәүләткилдеев, Әхмәт Лотфуллин, Александр Тюлькин, Борис Домашников, Әҙиә Ситдиҡова кеүек мәшһүр ижадсыларҙың картиналары менән таныша ала.

Халҡыбыҙҙың көнкүрешен, йолаларын, тыуған ер тәбиғәтен һүрәтләгән әҫәрҙәрҙең күбеһе үткән быуатта төшөрөлгән. Улар музей фонды бүлектәрендә махсус шарттарҙа һаҡлана.

Һәр картинала тарих сағыла. Ҡылҡәләм оҫталарының башҡарыу һәләте, тарихи-мәҙәни әһәмиәте белгестәр тарафынан юғары баһалана. Ай аҙағына тиклем сәнғәт ҡомартҡылары килеүселәргә үҙ серҙәрен асырға әҙер.