Асыҡ һауала сит ил, Рәсәй, Башҡортостан композиторҙары әҫәрҙәрен тыңларға 22 мең кеше йыйылды. Ул ғәҙәттәге урыны- Конгресс Холл аҫтындағы майҙанда- Өфө амфитеатрында уҙҙы. Өфө дәүләт сәнғәт институтының Йәштәр симфоник оркестры башҡарыуында 3 сәғәт дауамында музыка ағылды. Тамашасылар Чайковский, Моцарт, Бизе, Вивальди, Брамс, Мусогорский, Заһир Исмәғилев һәм башҡаларҙың әҫәрҙәрен тыңланы. Концертты хор коллективтары, айырым солистар һәм уйын ҡоралдары оҫталары сығыштары йәмләне. “Симфоник төн” Өфөлә дүртенсегә үтте. Ул “Евразия йөрәге” фестиваленең бер өлөшө булып тора. Бөгөн фестивалде “Урал моңо” менән “Кино төнө” дауам итә.