Баш ҡаланың урта махсус музыка колледжының етенсе класс уҡыусыһы Радмила Сабирова «Өмөт яҡтыһы» конкурсы йомғаҡтары буйынса Спиваков фонды стипендиаты булды. Ул Людвиг Ван Бетховендың «Оркестр өсөн тәүге концерт» музыкаль әҫәрен тәҡдим итте.

- Уҡыусыларыбыҙ Рәсәй һәм халыҡ-ара ярыштарҙа һәр ваҡыт яҡшы сығыш яһай. Беҙҙең колледж - Рәсәйҙең һигеҙ махсус музыка колледждарының береһе, ә уңыш серен, әлбиттә, уҡыусының эшһөйәрлеге һәм остаздың оҫталығы билдәләй. Радмила бик тырыш ҡыҙыҡай һәм, һис шикһеҙ, был наградаға лайыҡ, - ти  колледж директоры Ришат Сәғитов, йәш йырсының һәләтен билдәләп, - Бетховендың беренсе концертын был йәштә бик һирәк башҡаралар бит. Радмила Сабирова - Башҡортостандың атҡаҙанған мәҙәниәт хеҙмәткәре, Рәсәй Федерацияһының почетлы дөйөм белем биреү хеҙмәткәре Лия Кәримованың уҡыусыһы.