Экспозиция  Еңеү көнө,  тыныслыҡ, бәхет һәм  быуындарҙың рухи бәйләнешен һаҡлауға арналған. Байрам хужабикәһенә төбәп йырланған йыр-таҡмаҡтар күргәҙмәгә килеүселәрҙе лә бейетте. Был аңлашыла, сөнки Альбина Исхаҡова республикала күренекле йәмәғәт эшмәкәре булараҡ танылыу алған. Ә бөгөн ул сәнғәт һөйөүселәрҙе тәүге тапҡыр үҙенең ижад емештәре менән таныштырҙы. Күргәҙмә асылыу тантанаһына халыҡ күпләп килде.

Һаҡал, ҡашмау, түшелдерек. Күргәҙмәгә ҡуйылған милли биҙәүестәрҙең бында ниндәйе генә юҡ. Ҡул эштәре менән алты-ете йыл ныҡлап шөғөлләнеү осоронда уның коллекцияһы иллегә яҡын экспозиция менән тулыланған.
Республикала уҙғарылып килгән һәр бер конкурс, фестивалдәрҙә әүҙем ҡатнашҡан Альбина Хашим ҡыҙы селтәрҙәрҙе көндәлек тормошта ла ҡуллана. Ижадсы әйтеүенсә, милли биҙәүестәр тағып йөрөү кешенең холҡона тәьҫир итә. Ул юғары зауыҡ, ғорурлыҡ, нәзәкәтлелек кеүек сифаттар тәрбиәләй. Бөгөнгө күргәҙмә асыу тантанаһына килеүсе ҡатын-ҡыҙҙарҙың күбеһе күҙҙе ҡамаштырырлыҡ милли биҙәүестәр тағып килеүе һабантуй майҙанын хәтерләтте.
Күргәҙмәгә килеүселәр йыр-бейеүгә кинәнеп, ҡул эштәре менән яҡындан танышыу мөмкинлеген алды. Артабан сәнғәт һөйөүселәрҙе үҙенең музыкаль сығышы менән Альбина Хашим ҡыҙының ейәне Искәндәр Ханнанов һөйөндөрҙө. Йәш музыкант әйтеүенсә, өләсәһе унда бәләкәй саҡтан уҡ сәнғәткә һәм ижадҡа һөйөү тәрбиәләй. 
Галереяның ике залын биҙәгән ҡул эштәренең һәр береһе үҙенсәлекле. Был Альбина Хашим ҡыҙының рухи яҡтан бай, тынғыһыҙ кеше булыуын күрһәтә. Әйткәндәй, Исхаҡовтар ғаиләһе спорт менән дә дуҫ 79 йәшендә улар ГТО нормаларын үтәгән.  
«Мин яратам...» был һүҙҙәр Альбина Хашим ҡыҙының тормошто ысын күңелдән яратыуын белдерә, был тойғо уның һәр бер эшендә асыҡ сағылған. 80 йәше менән барған «халыҡ өләсәйе»нең шәхси күргәҙмәһе менән сәнғәт һөйөүселәр май аҙағына тиклем таныша ала. 

Сығанаҡ: http://tv-rb.ru/bash/novosti/m-ni-t/