«Һылыуҡай - 2015» конкурсына әҙерлек башланды
Башҡорт ҡыҙҙары араһында республикала йыл һайын уҙғарылып килгән «Һылыуҡай» гүзәллек бәйгеһенә әҙерлек башланды. Әле «Бәйләнештә» социаль селтәрендә буласаҡ ҡатнашыусылар өсөн тауыш биреү бара.
Конкурста 16 йәштән 22 йәшкәсә ҡыҙҙар ҡатнаша ала. Төп шарттар булып зифа, һомғол буй, күркәм йөҙ һәм әҙәби башҡорт телен белеү тора.
Һайлап алыу туры райондарҙа февраль айында, Өфөлә март башында үткәреләсәк. Конкурс финалы 10 апрель «Башҡортостан» концерт залында үтәсәк.
Быйылғы йылда «Һылыуҡай» бәйгеһе 23-сө тапҡыр уҙғарыласаҡ. Ошо йылдар эсендә бәйгелә 200-ләгән башҡорт ҡыҙы ҡатнаша. Матурлыҡ конкурсын «Башҡортостан» телерадиокомпанияһы, БР Мәҙәниәт министрлығы, Республика халыҡ ижады үҙәге һәм «Аҙна» гәзите ойоштора.
