Конкурста ҡатнашырға саҡырабыҙ
Республикабыҙҙа Шәйехзада Бабич шиғырҙарын яттан һөйләү буйынса конкурс старт ала. Ул илдә иғлан ителгән Мәҙәниәт йылына һәм шағирҙың тыуыуына 120 йыл тулыу айҡанлы уҙғарыла.
Конкурстың маҡсаттары:
- Бөйөк башҡорт шағирының ижадын пропагандалау;
- Киң ҡатлам уҡыусыны нәфис һүҙ сәнғәтенә ылыҡтырыу;
- Әҙәби әҫәрҙәрҙе тасури уҡыуға ҡыҙыҡһыныу тыуҙырыу.
Конкурсты «Ватандаш» журналы, З.Исмәғилев исемендәге Өфө сәнғәт институтының режиссура һәм актер оҫталығы кафедраһы, «Башҡортса статустар», «Бабич Шәйехзада Мөхәмәтзакир улы» төркөмдәре ойоштора.
Конкурс ике этапта үтә.
I этап – 22 сентябрҙән 1 декабргә тиклем үтә. Унда һәр кем ҡатнаша ала. Шағирҙың үҙегеҙ теләгән шиғырын яттан һөйләгән сығышты видеоға төшөрөргә һәм «Бәйләнештә» төркөмөндә ойоштороласаҡ махсус төркөмгә ебәрергә кәрәк. Жюри иң яҡшы 25 сығышты II этапҡа һайлап ала.Бәйгенең икенсе туры сәнғәт институтының Ғ.Ғиләжев исемендәге уҡыу театрында үтәсәк.
Жюри составына Рауил Бикбаев, Таңсулпан Бабичева, Лариса Абдуллина, Азамат Юлдашбаев, Гүзәл Ситдыҡова кеүек билдәле шәхестәр ингән.
