Өфө театрҙары үҙ ишектәрен аса!

Республиканың мәҙәни үҙәге Өфөлә тупланған мәҙәниәт усаҡтары- театрҙарыбыҙ әүҙем рәүештә, бер-бер артлы үҙҙәренең ижад миҙгелен асып, ғәҙәти эшкә сумды, ә ҡайһылары йыйына ғына әле.
М. Ғафури исемендәге БДАД театры быйыл 96-сы ижад миҙгеленә аяҡ баҫа.
Яңы ижад миҙгелен асыу тантанаһы 2 октябргә тәғәйенләгән.
Был көндә театр тамашсыларына билдәле башҡорт халыҡ эпосы буйынса, яҙыусы Таңсулпан Ғарипова һәм режиссер Олег Хановтың уртаҡ ижад емеше «Маҡтымһылыу, Әбләй һәм Ҡара юрға» мюзиклы тәҡдим ителәсәк.
96-сы ижад миҙгеленең яңылығы иһә, Рәсәйҙең ҡаҙаҡ сығышлы билдәле йәш яҙыусыһы һәм драматургы Олжас Жанайдаровтың “Йот”, тип аталған әҫәре буйынса , режиссер Башҡортостандың атҡаҙанған сәнғәт эшмәкәре Айрат Абушахманов әҙерләгән драма.

Өфө “Нур” татар дәүләт театры яңы ижад миҙгелен татар драматургы Аманулланың “Беҙҙең ауыл артистары. Татарса дель арте” спектакле премъераһы менән асты.
Яңы комедия ҡабаттан киләһе айҙа, 10,11,23 октябрҙә күрһәтеләсәк.

Мостай Кәрим исемендәге Милли йәштәр театрын үҙ итеүселәр театрға 8 октябргә, 26-сы ижад миҙгелен асыу тантанаһына саҡырыла.
Был кистә тамашсыға театрҙың ҙур залы сәхнәһендә рус труппаһы башҡарыуында М. Камолеттиҙың “Французса гарнир” комедияһы, ә камера залында башҡорт труппаһы уйнауында С. Айтматовтың “Диңгеҙ ярын иңләй ала эт” спектакль-хикмәте күрһәтеләсәк.