Башҡортостанда Булат Солтангәрәев исемендәге йәштәр премияһы лауреаттары билдәләнде
Башҡортостандың баш ҡалаһында Булат Солтангәрәев исемендәге республика конкурсына йомғаҡ яһалды. Конкурста белем биреү учреждениеларының 10-сы һәм 11-се класс уҡыусылары, лицей һәм колледж студенттары ҡатнашты. Ижади бәйге еңеүселәренә 15, 10 һәм 5 мең һум аҡсалата премия тапшырылды.
Беренсе урынды Бөрйән районы Байназар ауылы урта мәктәбенең 10-сы класс уҡыусыһы Зилиә Буранбаева яуланы. Уның шиғырҙарында үҙ алдыңа үҫешеү һәм үҙ-үҙеңде танып белеү темаһы, йәштәр проблемалары асыла.
Икенсе урынды ике кеше бүлеште. Улар — Ишембай ҡалаһы Ә.Вәлиди исемендәге 2-се Башҡорт гимназия-интернатының 11-се класс уҡыусыһы Роберт Горбунов һәм Рәми Ғарипов исемендәге 1-се Башҡорт республика гимназия-интернаты уҡыусыһы Нәфисә Торомтаева. Уларҙың һәр береһенә 10 мең һум премия тапшырыла.
Өсөнсө урын өс уҡыусыға бирелде. Улар – Бөрйән районы Байназар ауылы урта мәктәбенең 10-сы класс уҡыусыһы Сәлимә Дәүләтшина, Баҡалы районы Баҡалы ауылы 1-се урта мәктәбенең 10-сы класс уҡыусыһы Илнар Әхмәтханов, Әбйәлил районы Ҡырҙас урта мәктәбенең 10-сы класс уҡыусыһы Зәлиә Сәғәҙәтова. Был лауреаттарға — 5 мең һум премия.
Эпидемиологик хәлгә бәйле еңеүселәрҙе Белем көнөндә — 1 сентябрҙә бүләкләү күҙаллана.
Ойоштороусы — Башҡортостан Республикаһы Журналистар союзы менән берлектә «Йәшлек» гәзите. Быйыл конкурс Башҡортостан Республикаһы башлығының гражданлыҡ йәмғиәтен үҫтереүгә йүнәлтелгән грантына уҙғарылды.
