16 июндә Башҡортостандың милли геройы, шағир һәм полководец Салауат Юлаевтың тыуыуына 266 йыл тула. Быйыл Салауат Юлаев көндәре тәүгә онлайн уҙғарыла.
Милли батырҙың тыуған көнө уңайынан 12 июненән 16-һына тиклем флешмоб уҙа. Флешмобта сәсәндәр, халыҡтың ауыҙ-тел ижадын һөйөүселәр ҡатнаша ала. Улар социаль селтәрҙә #БашҡортСәсәндәре #СалауатМенән #СалауатЮлаев #РЦНТРБ #МКРБ #ЦентрСэсэновРБ хештегы менән Салауат Юлаевҡа арналған йырҙар һәм ҡобайырҙар башҡара, яугир шағирҙың шиғырҙарын һөйләй, видеороликтар менән бүлешә.
Ойоштороусылар: Башҡортостан Республикаһының Мәҙәниәт министрлығы, Республика халыҡ ижады үҙәге һәм Башҡортостан Республикаһының сәсәндәр үҙәге.