Бөгөн, 18 ноябрҙә, «Башҡортостан» дәүләт концерт залында төрлө милләт ҡыҙҙары араһында гүзәллек бәйгеһе уҙҙа. Конкурс финалына 12 һылыуҡай үтте. Улар араһында Африка, Һиндостан, Ҡырғыҙстан, Ангола, Куба кеүек төрлө ил вәкилдәре бар.

Үҙенсәлекле конкурс республикала икенсе тапҡыр уҙғарыла. Ойоштороусылар билдәләүенсә, бәйгелә ҡатнашыусылар матурлыҡ буйынса ғына түгел, ижади һәләттәре лә баһаланасаҡ.

Әйткәндәй, сара конкурс авторы Земфира Рәшитова башланғысында ойошторола. Ул быйыл йәй Ҡырымда үткән «Таврида» форумда ошо проект менән сығыш яһап еңеү яулағайны.