Бер йыл элек ошолай уҡ буранлы февраль айында Мәжит Ғафури исемендәге Башҡорт академия драма театрының күренекле артистары – СССР-ҙың, Рәсәйҙең һәм Башҡортостандың халыҡ артисы Гөлли Мөбәрәкова (1936-2019) һәм Рәсәйҙең, Башҡортостандың халыҡ артисы Заһир Вәлитов (1940-2019) арабыҙҙан китте.

Улар икеһе лә ғәжәйеп юғары мәҙәниәтле, эшенә мөкиббән киткән, туған театрына ғүмер буйы тоғро булған шәхестәр ине. Гөлли Арыҫлан ҡыҙы һәм Заһир Суфиян улы башҡорт театр сәнғәтендә яҡты эҙ ҡалдырҙы – сәхнәлә уйнаған ролдәре, радио фондында уҡыған әҫәрҙәре, хеҙмәттәштәренә күрһәткән изгелектәре мәңге хәтерҙә йәшәйәсәк.