Мәжит Ғафури исемендәге Башҡорт академия драма театры «Театр мәктәп таҡтаһы янында» исемле мәҙәни-мәғариф проектын башлап ебәрҙе. Проекттың художество етәксеһе – Айрат Абушахманов.
11 мартта проектта ҡатнашыусылар өсөн беренсе уҡыу (читка) үтте. Йәш шеф-драматург Ангиза Ишбулдина һәм театр артисттары Лилиә Ғалина, Гөлназ Хайсарова, Әлфирә Зәһиҙуллина, Айнур Ситдиҡов, Алмаз Йосопов, Азат Вәлитов беренсе спектакль-дәрескә тотондолар. Улар А.С. Пушкиндың «Повести Белкина» циклынан «Выстрел» һәм «Барышня крестьянка» повестарын уҡынылар.
«Репетицияләр тәмамланғандан һуң, спектакль-дәрес 6-сы синыф уҡыуслыларына әҙәбиәт дәресе урынына күрһәтеләсәк. Спектаклдең оҙонлоғо – 45 минут», – тинеләр театрҙа.