Салауат районы Мөрсәлим ауылында мәҙәниәт йорто эшләй башланы. Төҙөлөш бер йыл тигәндә башҡарылды. Яңы мәҙәниәт усағы 200 урынлыҡ. Заманса яҡтыртыу, тауыш һәм мультимедиа ҡорамалдары менән йыһазландырылған. Музыка ҡоралдары, сенсор панелле конференция мониторы ла бар. Ошонда уҡ балалар сәнғәт мәктәбе, китапхана урынлашҡан. Мәҙәниәт усағын асыу тантанаһына килеүселәргә ҡурсаҡ театры тамашаһы күрһәтелде, урындағы ҡул эштәре оҫталарының декоратив сәнғәт күргәҙмәһе ойошторолдо. Китапханала Бөйөк Еңеүҙең 75 йыллығына арналған әҙәби уҡыуҙар уҙҙы.