Өфөлә, 14 декабрҙә, «Торатау» конгресс-холында Башҡортостан Республикаһының етәксһе Радий Хәбиров Бөтә донъя башҡорттары ҡоролтайы президиумы ағзалары һәм республика район-ҡалалары ҡоролтайҙары рәйестәре менән осрашты. Осрашыуҙың маҡсаты башҡорт телен һаҡлау һәм үҫтереү тәҡдимдәрен тикшереү ине. Йыйынды Бөтә донъя башҡорттары ҡоролтайы Президиумы рәйесе, Дәүләт Йыйылышы – Ҡоролтай рәйесе урынбаҫары Эльвира Айытҡолова асты. «Башҡорт теленең үҫеше, ҡулланылыу даирәһе өсөн был көн бик мөһим. Туған телебеҙҙең яҙмышы һәр беребеҙгә туранан-тура бәйле. Башҡорт теле юғары даирәләргә лә күтәрелде, хәҙер мөһим ултырыштарҙа башҡортса сығыш яһай башлауҙары һәр беребеҙгә мәғлүм», – тине Радий Хәбиров. Һөйләшеү фәһемле һәм эшлекле үтте.