Салауат Юлаев исемендәге республика дәүләт премияһы лауреаты Динис Бүләковтың «Ғүмер бер генә», «Килмешәк» исемле романдары Төркиәлә нәшер ителгән. 

Күренекле башҡорт яҙыусыһының ижады Төркиәнең Гази университеты уҡытыусыһы, филология фәндәре докторы Нигяр Ҡалҡандың докторлыҡ диссертацияһы өсөн тема итеп һайланған булған. Һөҙөмтәлә, был ике романдың стилистикаһы, семантикаһы тикшерелгән ваҡытта улар төрөк теленә тәржемә ителгән.

Романдар Анкараның Этимесгут районы хакимиәте, «Бенгю» Евразия Яҙыусылар союзы һәм ТӨРКСОЙ халыҡ-ара төрки мәҙәниәте ойошмаһы менән берлектә нәшер ителгән.

Динис Бүләков.

1944 йылдың 18 майында Мәләүез районының Арыҫлан ауылында тыуған.

1959 йылда «Башҡортостан пионеры» гәзитендә «Маҡтансыҡ Зариф» исемле тәүге хикәйәһе донъя күрә.

1971 йылда Динис Бүләковтың йәштәрҙең көнүҙәк проблемаларын сағылдырған «Ҡояш ярсығы» тип аталған тәүге хикәйәләр йыйынтығы нәшер ителә.

Динис Бүләковты повесть жанрында ижад ителгән әҫәрҙәре аша ла яҡшы беләбеҙ. Уның «Ҡыңғырау сәскә», «Һары һандуғас балаһы», «Иң оҙон төн» һәм башҡа әҫәрҙәрендә гражданлыҡ, ғәҙеллек, әхлаҡлылыҡ, кешенең рухи тамырҙары идеялары ярылып ята.

Динис Бүләков – билдәле романсы ла. «Килмешәк», «Ғүмер бер генә», «Туҙҙырылған тамуҡ» исемле романдары заманында яңы күренеш була.

1993 йылда «Ғүмер бер генә» әҫәре өсөн Динис Мөҙәрис улы Бүләков Салауат Юлаев исемендәге республика дәүләт премияһы менән билдәләнә.

Динис Бүләков 1995 йылдың 14 мартында беҙҙең аранан китеп барҙы. Ул йәшәгән йортта мемориаль таҡтаташ урынлаштырылды, Смак ауылында яҙыусының әҙәби музейы булдырылды.