«Берҙәм Рәсәй» партияһы проекты сиктәрендә ауыл клубтарын төҙөкләндереүгә, сәхнә кейемдәре, музыка ҡоралдары һатып алыуға  46 миллион һум аҡса бүленә. Ярҙам клубтарҙа ремонт уҙғарыу, матди-техник базаны нығытыу һәм музыка ҡоралдары алыу өсөн йүнәлтелә. Тәүге исемлеккә 34 райондың ауыл клубтары эләккән. Шулар иҫәбендә Ейәнсура районының Таҙлар ауыл мәҙәниәт йорто.

Һуңғы йылдарҙа яҙ етеүгә, ҡойма ямғырҙарға Таҙлар ауыл мәҙәниәт йорто хеҙмәткәрҙәре ныҡлы әҙерләнә. Миҙгелде улар бина ҡыйығынан тамған тамсы урындарына һауыт-һаба, күнәктәр ултыртып ҡаршылай. Тик бындай ғына һаҡланыу сараһының  файҙаһы ғына юҡ, тип борсола ауылдаштар. Мәҙәниәт йортондағы китапхана ла байтаҡ зыян күргән. Ә бит фондта ун ете меңләп китап иҫәпләнә. 
Ете ауылды хеҙмәтләндергән Таҙлар мәҙәниәт йортонан халыҡ өҙөлмәй. Балалар, йәштәр һәм өлкәндәр өсөн йыр-бейеү түңәрәктәре эшләп килә. Ижади коллектив ағзалары  түбәнән  тамсы тамған урындарҙы яҡшы белә. Үҙҙәренсә һаҡланыу сараһын да күрә.
Уҙған быуаттың илленсе йылдар аҙағында төҙөлгән бина ныҡ таушалған. Быға тиклем мәҙәниәт усағында бер тапҡыр ҙа капиталь ремонт эштәре башҡарылмаған. Шуға ла айына кәм тигәндә ике тапҡыр күләмле концерттар ҡуйған һәүәҫкәр артистарҙың сығыштарын яратып ҡараған тамашасы ла, ауыл халҡы ла проектты дәррәү күтәреп алды. 
Ниһайәт, быйыл «Берҙәм Рәсәй» партияһы проекты сиктәрендә ауыл мәҙәниәт йортона ремонт эшләнәсәк.Тулыһынса тамашасы залын яңыртыу, яҡтыртыу ҡорамалдарын алыштырыу, мебель, тауыш аппаратураһын һатып алыу ҡаралған.  
Әйткәндәй, ауыл халҡы урындағы башланғыстарҙы яҡлау программаһында ҡатнаша, быйыл миллион дүрт йөҙ мең һум аҡсаға мәҙәниәт усағының ҡыйығын алыштырыу ҡаралған. 
Әлегә йыр-моңға ғашиҡ Һүрәм буйы халҡы апрель айында районда үтәсәк Гала-концертҡа әҙерләнә. 

Сығанаҡ: http://tv-rb.ru/bash/novosti