Башҡортостанда «Боронғо Өфө» археология паркын булдырыу концепцияһы раҫланды. Хөкүмәттең тейешле ҡарарына Республика Башлығы вазифаһын башҡарыусы Радий Хәбиров ҡул ҡуйҙы. 
«Боронғо Өфө» археология паркы федераль әһәмиәттәге «Өфө-II ҡаласығы» археология ҡомартҡыһы биләмәһендә урынлашасаҡ. Парк булдырыуҙың төп маҡсаты – археологик мираҫ объектының һаҡланыуын тәьмин итеү һәм уны популярлаштырыу.

Өфө – II ҡаласығы-баш ҡаланың үҙәгендә, хәҙерге Пушкин, Яңы күпер урамдарында, Салауат Юлаев проспектының башында урынлашҡан. Был ҡаласыҡ I быуатта уҡ төҙөлгән һәм XV – XVI быуаттарға тиклем һаҡлан­ған. Испан картографы Меркаторҙың 1554 йылғы картаһында хәҙерге Өфө йылғаһы тамағында урынлашҡан ҡала Башҡорт (Башкирти) тип атала. Ҡаҙыныуҙар барышында монументаль архитектура объекттары – нигеҙенең киңлеге – 10 метр, бейеклеге 4 – 5 метрға еткән ҡеүәтле диуар, тәрән һәм киң соҡор, тура мөйөшлө һәм тирмә рәүешендәге торлаҡ эҙҙәре, уртаса киңлеге 2 метр, оҙонлоғо 50 метрҙан ашыу ағас күпер, тимер һәм баҡыр иретеү мейестәре, ювелир оҫтаханаһы ҡалдыҡтары табылған.