Башҡорт дәүләт опера һәм балет театрында Ариф Меликовтың “Мөхәббәт хаҡында легенда” балеты тәҡдим ителә. Балетты сәхнәгә ҡуйыусы - СССР-ҙың халыҡ артисы, СССР-ҙың Дәүләт һәм Ленин премиялары лауреаты, Социалистик хеҙмәт геройы - Юрий Григорович. Билдәле хореографтың ассистенттары – РФ атҡаҙанған артистары Олег Рачковский һәм Ольга Васюченко.

56 йыл элек , 1961 йылдың 23 мартында С.М.Киров исемендәге Ленинград опера һәм балет театрында (элекке Мариинский театры) сәхнәләштерелә был балет. Ул ваҡытта “Мөхәббәт тураһында легенда” балетының ҡуйылышында билдәле рәссам Симон Вирсаладзе ҡатнаша . Көнсығыш легенда мотивы буйынса либретто авторҙары төрөк шағиры, яҙыусы, драматург һәм йәмәғәт эшмәкәре, “Ширин һәм Фәрхәд” пьесаһы авторы- Назым Хикмәт һәм Юрий Григорович. Матур көнсығыш тарихы һүрәтләнгән был балет Рәсәйҙә генә түгел, сит илдәрҙә лә бер-нисә тапҡыр күрһәтелә. Өфө сәхнәһендә Ариф Меликовтың “Мөхәббәт тураһында легенда” балеты иҫәп буйынса ун икенсеһе.

“Мөхәббәт тураһында легенда” –Юрий Григорович етәкселегендәге етенсе ҡуйылыш. Сюжеттың нигеҙендә боронғо көнсығыш легендаһы ята. Апалы-һеңлеле Мәхмүнә Баныу һәм Ширин Фәрхәд исемле рәссамгә ғашиҡ булалар. .. Егеттең күңелен Ширин шундуҡ яулап ала. Мәхмүнә Баныу һеңлеһен ҡотҡарыу, халҡы өсөн Фәрхәдтең ниндәй аҙымдарға барыуын белгегегеҙ килһә - Башҡорт дәүләт һәм опера театрына рәхим итегеҙ! Спектаклденең ҡуйыусы режиссеры Башҡортостан Республикаһының атҡаҙанған сәнғәт эшмәкәре Герман Ким. Балет труппаһының художество етәксеһе - РФ һәм БР халыҡ артисы, С.Юлаев исемендәге дәүләт премияһы лауреаты Леонора Ҡыуатова. Башҡарыусылар составында – БР халык артисы, С.Юлаев исемендәге дәүләт премияһы лауреаты Гөлсинә Мәүлекәсова, БР халык артисы, С.Юлаев исемендәге дәүләт премияһы лауреаты Илдар Маняпов, БР атҡаҙанған артисы Рөстәм Исхаҡов, БР атҡаҙанған артисы Олег Шәйбәков, Сергей Бикбулатов, Лилиә Зәйнәғәбдинова, Софья Гаврюшина, Белла Оздоева, Данила Алексеев.

Мәжит Ғафури исемендәге Башҡорт дәүләт академия драма театры коллективы 97-се ижад миҙгелен тамамларға әҙерләнә. Бөгөн сәхнәлә А. Баймөхәмәтовтың “Хыялға ҡаршы” героик булмаған повесы. Иртәгә И. Йомағоловтың “Нәркәс” трагедияһы. 18 май иһә, театрҙың был миҙгелдәге һуңғы тамашаһы-“Сәмле ярыш – Баттл” заманса театрлаштырылған концерты.

Рус дәүләт академия драма театрында Ф. Достоевскийҙың “Енәйәт һәм яза” әҫәренең сәхнә варианты.

 Өфө дәүләт “Нур” татар театры Хәй Вәхиттең “Туй алдынан” драмаһын күрһәтә.

М. Кәрим исемендәге Милли йәштәр театрында Т. Миңнуллиндың “Йәнкиҫәккәйем” комедияһы көтөлә.

Тамашаларға рәхим итегеҙ!